SKorea-ah Samsung neitu man
Samsung company rochuntu tur, Lee Jae-yong chu thamna pea puh leh thubuai dang avangin nimin khan South Korea-ah man a ni.
Samsung hotu man a nihna chhan hi South Korea president aṭanga chawlhtir mek, Park Geung-hye-in dik lo takin a thuneihna a hmang nia puhna thubuai kaihhnawih a ni. Park-i
ṭhianṭha, Choi Soon-sil-i enkawl foundation tan sorkar lam aṭanga duhsakna an dawn theih nan Samsung hian sum ṭhahnem tham tak a thawh nia puh a ni bawk.
January khan prosecutor-te chuan Lee hi thu an lo zawtfiah tawh a, tunkar tir lam khan an ko nawn leh.
Nimin khan court chuan Lee puhna chungchangah finfiahna tharte a awm leh avangin man turin thupek a tichhuak a, man nghal a ni. Ningani khan detention centre-ah hren lai lawk alo ni tawh a ni. Prosecution chuan ni 20 chhungin dan angin a lakah thubuai hi an ziak lut ang.
Prosecutor-te chuan Lee hian Park-i ṭhian ṭha, Choi-i nena inzawmna nei organisation tan dollar maktaduai 36 zet sum an pe niin an sawi. Hei vang hian sorkar lam aṭangin duhsakna a dawn phah hle niin an sawi a, Samsung hnuaia unit pahnihte chhunfinna turah pawh sorkar lam pawmpuina hmuh theih phah niin an sawi. Kum 2015 khan Samsung C&T leh Cheil Industres chu chhunfin a ni a, hei hi investor tam takin duh lo mah se, Samsung shareholder lian ber, South Korea state pension fun-in a remtih avangin kaltlangpui a ni.
Lee Jae-young hi Samsung dintu, Lee Byung-chul-a tupa a ni a, a pa Lee Kun-hee hi company chairman nilai a ni. Kum 48 mi a ni a, tunah hian Samsung Electronics-ah vice chairman a ni a, a pa kum 74 mi chu a chawlh veleh a aiawhtu tura rin a ni. Hetihlai hian mi ṭhenkhat chuan sumdawnna lama tawnhriat a neih ṭhat leh thiam vang niloin, thlahtute avanga dinhmun pawimawh chelh theih chauh niin an sawi.