Pakistan-a bomb puakah mi 75 an thi
Pakistan chhim lam, Sindh province-a Sehwan khuaah Ningani zan khan thihchilh bomb a puak a, mi 75 an thi.
Thihchilh bomb hi Shiite Muslim-te hmun thianghlim, Lal Shahbaz Qalander thlanah tihpuah a ni, kum hnih chhunga Pakistan rama pawikhawihna thleng rapthlak ber a ni. Bomb paitu hian thlan chhung, hall lian bera ṭawngṭaia hu hmang mi tam tak an awm laiin a bomb pai hi a tipuak a, thi zingah hian hmeichhia 20 leh naupang pakua an tel.
Sehwan khuaa pawikhawihna rapthlak tak a thlen hnu hian, Islamic State (IS) firfiak pawl chuan an tih niin an chhal a, Shiite Muslim-te chu an bitum ber an nih thu an sawi. Sunni Muslim firfiak-te chuan Shiite-te hi an thurin phatsantu-ah an ngai a, tunhma lam pawhin an lo bei fo tawh a ni.
Hmun thianghlim beih a nih avang hian Pakistan thuneitute chuan Afghanistan kalpawhna, Torkham ramri chu tiamchin awm loin an khar nghal. Ramri kaltlanga insumdawn tawnna hrang hrangte pawh tihtawp nghal a ni.
Prime Minister Nawaz Sharfi-a chuan pawikhawihtute chu security force-te’n an man ngei dawn tih a sawi a,”Pakistan mite thisen hi a thlawnin a luang dawn lo a, phuba kan la ngei dawn a ni”a ti. Pakistan sipai hotu, Gen. Qamar Javed Bajwa pawhin pawikhawihtute chu tumah an dim dawn lo tih a sawi bawk.
US chuan Pakistan rama pawikhawihna thleng chu a dem thu sawiin, bomb tipuaktute manchhuak tura an beihnaah puih an inhuam thu a sawi. US State department thupuangtu, Mark Toner chuan Pakistan mipuiten firfiaka chetna an doletna chu US chuan a thlawp tlat a, an rama himna a awm theihnan theihtawp an chhuahpui zel tur thu a sawi.