NKorea-in ram dang ṭanpuina a hnawl

North Korea-in official-a an rama Covid-19 hri kai hmuh chhuah a nih thu a puan hnuah hri leng vangin harsatna nasa tak an tawk mek a, hetih lai hian ram dangten puih an tumna erawh a hnawl.

United States leh South Korea chuan hri leng dona kawnga ṭanpui an duh thu an sawi chu NKorea hian chhanna an la pek lo tih South Korean official-te chuan an sawi.

World Health Organization chuan hri leng nasa zawk thleng thei dinhmuna ding mek ram hian an ramchhung chanchin engmah an hrilh chiang duh lo tih a sawi bawk.

UNICEF chuan Ningani khan health worker chhawk zangkhaina tur leh hri kai pung chak lutuk veng turin chhawmdawlna pek a duh a, mahse NKorea ram chhunga an thawhpuite chu an be thei rih lo.

US leh SKorea lamin puih an tumna la chhang duh lo mah se, NKorea hian a ṭhenawm China puihna dil a tum nia sawi a ni a, mahse hei pawh thuchiang a la hriat loh. An ram airline, Air Koryo chuan hri leng kaihhnawiha an mamawh lalut turin China-ah thlawhtheihna a tir lut tawh tih South Korean news outlet ṭhenkhat chuan an sawi.

Kum hnih leh a chanve chhung an ramah Covid hri lut loin an indang thei tih sawitu, North Korea chuan May 12 khan Covid-19 kai hmasa ber hi an report a, hemi hnu hian hri chu chak takin a darh zui a ni. Kim chuan hri leng ṭai darh chhanah official-te chu a puh a, mipui chetvelna tam tak bakah khawpui leh region inkara supply pawh khuahkhirh a ni.

Korean Central News Agency chuan April thla tawp aṭang khan mi maktaduai 1.98 chuangte chuan khawsik natna an nei tawh niin a tarlang. Khawsik tam zawk chu Covid-19 kai an nih rin a ni a, hetih lai hian an zinga mi tlemte chauhin omicron variant hi an kai tih an la nemnghet a ni. Mi 7,40,160 vel chu khunghran mek an nih thu news agency chuan a tarlang bawk.