Covid vanga thihna 21% in a tlahniam : WHO

World Health Organization (WHO) chuan kar liam ta kha khawvel pumah coronavirus kaihhawih avanga thihna chu 21% velin a tlahniam tih a sawi.

WHO-in Ningania weekly pandemic report a tihchhuahah, kar liamtaa hri kai an tlakhniam thu hi a sawi a, hetih lai hian hri kai thar erawh 1% in an pung tih a tarlang bawk. America, Middle East, Africa leh Western Pacific-ah hri kai hi an pung a, Europe leh Southeast Asia-ah erawh an tlahniam thung.

WHO hotu Tedros Adhanom Ghebreyesus chuan vaccine semchhuah lohna ram NKorea-ah hian Covid-19 hri a darh chu pawi a tih thu leh, a bikin natna benvawn neite chu dinhmun hlauhawm takah an din avangin fimkhur turin a chah a ni.

UN health agency hian NKorea chu an ram chanchin kimchang zawka tarlang tur leh ramdang aṭanga vaccine, test leh damdawi hmanga ṭanpuina kawng an siam ang ang te chu lo pawm turin a ngen a, mahse nimin thleng kha chuan chhanna an la pe lo tih Tedros chuan a tarlang.