Trump-a’n IS nuai chimih vek a tiam

US President Donald Trump-a chuan Islamic State (IS) firfiak pawl chu nuai chimih vek a tiam a, an ram himna tura hmalakna peng pakhat atan US sipaite thuam ṭhat a tiam bawk.

Florida-a rally a neihah he thu hi Trump chuan a sawi a, document mumal nei loa an rama mi tam tak an lut ṭhin chu na takin a sawisel zui bawk.

Remna leh muanna lam chanchin aiin indona, tualchhung buaina thleng an hre nasain an hmu nasa zawk niin Trump chuan a sawi. “Hnehna chang turin kan bei tawh lo a ni. Sumdawnna lamah pawh hnehna kan chang tawh ngai lo a, thildangah pawh hnehna kan chang tawh ngai lo. Mahse tunah chuan hnehna hi kan chang chho leh tawh dawn a ni” a ti.

Trump chuan Defence Secretary Jim Mattis-a kaihhruai defence community hnenah IS nuai chimih vek an nih theihna tura ruahmanna siam tur te, US sipai din thar lehna tur ruahmanna siam tur tea a chah thu a sawi. America sipaite chu thuam ṭhat an ni tawk lo tih a sawi a, “Khawvela sipai thuam ṭha ber siamtu kan ni a, kan thil siam tunlai ber leh ṭha berte chu kan hmang tawh dawn a ni” tiin a sawi bawk.