Iraq sipaiten Mosul khawthlang lamah beihpui thlak

Iraq sipaiten Islamic State (IS) firfiakte kut aṭanga an ram khawpui pawimawh, Mosul laklet tuma beihpui an thlakna kal zelah, khawpui khawthlang lam bial chu tha tharin an bei leh.

Iraq Prime Minister Hai­der al-Abadi chuan sipaite hian Tigris lui thlang lam, khawpui chhim lama Mosul airport pawh firfiakte kut aṭanga la turin tha tharin an bei leh mek niin a sawi.

TV-a thu a sawiah, PM Abadi chuan Mosul khawthlang lam bial chu an la thuai dawn tih a sawi. Firfiakte leh sipaite inbeihna avang hian Mosul khawthlang lamah civil mi 750,000 vel an tangkhang mek nia sawi a ni.

Sipaiten beihpui an thlak dawn hian khawpui chhunga chengte inthiar chhuahna hun hawn ni mah se, mi tam zawk chuan Mosul khua hi an chhuahsan duh lo a ni. Inrinni khan sipaite chuan khaw­thlang lam bialah hian lehkha thlakin, IS firfiakte umchhuak tura beihpui an thlak tur thu hi an thehdarh a ni.