Barcelona-ah mi 160,000 chuangin kawng zawh

Spain sorkar chu raltlan tam zawk luh phalsak tura phutin Barcelona khuaah mi 160,000 chuangin kar kalta Inrinni khan kawng an zawh.

Spain hian kum 2015 khan raltlan 17,000 lakluh lo intiam tawh mah se, tun thlengin mi 1,100 chauh an luh a la phalsak a ni. Ratlan lakluh a tiamte hi Italy leh Spain-a refugee camp aṭangin mi 15,888, Turkey leh Libya aṭangin mi 1,449 a ni.

Catalonia bial khawpui, Barcelona-a kawng zawhte hian Spain sorkar chu raltlante tana inhawng zau tura an phutna thuziakte an keng a, ramri chu hawng a, chhuanlam dang siam tawh loa raltlante an luh phalsak tura an phut thu an sawi.

Barcelona police-te cuan kawngzawhnaah hian mi 160,000 vel an tel niin an sawi a, mahse a buatsaihtute erawh chuan mi 300,000 chuang an ni tih an sawi thung. Kawngzawh huaihawttu zinga mi, Ruben Wagensberg chuan Spain sorkar chu a thu lo tiam tawhte tipuitling tura an phut thu a sawi. Kawngzawhnaah hian Barcelona Mayor Ada Colau pawh a tel.

Hetih lai hian European Union member dang, Germany chuan kum 2015 khan inhumhimna dila an rama luh dil mi 890,000 leh kum 2016-ah mi 280,000 a lo la lut tawh a ni.