WHO-in Covid-19 guideline tichhuak thar
World Health Organization (WHO) chuan Ningani khan Covid-19 hri leng mek chu boruak aṭanga inkaitheih a nih palh thilah, invenna atan guideline a tichhuak thar.
Guideline a tihchhuahah hian mipuite chu indoor-a mipui tam theihna hmuna kal lo tura hriattir a ni a, mahni inah ventilation ṭha tak nei thei ṭheuh turin a hriattir bawk a ni. Hei bakah hian midang hlata awm (social distancing) leh hmaituamna (mask) vuah ṭha turin a hriattir nawn leh bawk.
Khawvel ram hrang hrang aṭanga mi thiam, scientist rual 200 chuangin Covid-19 hri hi boruaka leng a nih thu WHO hnenah an thlen a, guideline pawh siam thar turin an lo ngen tawh a ni. WHO chuan scientist-te thusawi hi a hnial thla lo a, hemi rual hian boruakah hri hi a leng ngei tih finfiahna ṭha a la awm lo niin a sawi a, zirchianna neih a ṭul thu a sawi. Boruaka leng a ni tih chu finfiahna tak la awm lo mah se, a awm palh thilah tiin guideline hi a tichhuak thar a ni.
WHO chuan Covid-19 hri hi a kai tawh te chil, khuh, hahchhiau, tawng leh zai aṭanga chil per leh a dangte aṭanga inkai chhawn theih a nih thu a tarlang a, he hri kai anmahnia natna langchhuak loten midang an kai chhawn hi WHO chuan a tlem hle tih a tarlang bawk.
Thawhho loh chuan Covid-19 do hneh theih a ni lo
WHO director-general Dr Tedros Adhanom Ghebreyesus chuan khawvel ram puma leng mek, Covid-19 chu thawhhona nen lo chuan hneh theih a nih loh thu a sawi.
Nilaini khan kum 70 lai WHO member ni tawh US chu nakkum July 6-ah WHO member a nihna aṭangin ban a tum tih United Nations (UN) chuan a tarlang a, hemi chungchanga press conference a neihah WHO hotu Dr Tedros chuan hri dona kawnga thawhho a pawimawh thu sawiin, Covid-19 leng mek chu khawvel mipuite hmelma inang neih a ni tiin, inṭhendarh chung chuan an hneh thei dawn lo tih a sawi a, he thu a sawi lai hian lungchhiain a mittui a tla hial a ni.
Tedros chuan he hri leng hi eng ram tan pawh hmelma a nih thu a sawi a, he hri hian khawvel ram hrang hrangte kan ṭan ho na a ṭha tawk em tih min enchhin a ni, a ti. "Kan inṭhenhran chuan he hri hian bu a khuar zel dawn a, nunna tam tak a lak belh zel thei a ni," tiin Tedros chuan a sawi bawk. US-in WHO member a nihna aṭang inhnuhdawh a tum chhan hi hri leng dona kawnga WHO hma lak dan a duh loh vang a ni a, WHO chu China lama ṭang leh, China-in an duh dan anga a thunun theih niin a sawi a, hei vang hian vawi tam tak a lo sawisel tawh a ni.