SAfrica, Mexico leh US-ah hri kai tam ber ni thleng

Khawvela hripui leng mek chuan ziaawm lam a pan thei lo a, nitin hri kai thar leh hri vanga thi an la pun belh zel. 

Nimin thleng khan khawvel pumah hri kai hi mi 1,24,09,567 an awm tawh a, mi 5,57,847 in an thihpui tawh bawk. South Africa, Mexico leh US-ah chuan Ningani khan an rama hri kai hmuh chhuah thar tam ber ni a ni leh. SAfrica-ah hri kai hmuh thar mi 13,674 awmin hri kai hmuh chhuah tawh hi 2,38,339 an tling tawh a ni. 

Mexico-ah pawh hemi ni hian  hri kai hmuh chhuah thar 7,280 an awm a, heng mite nen hian an rama Covid-19 kai hmuh tawh hi mi 2,82,283 an awm tawh. Khawvela hri kai tamna leh hri vanga thi tamna ber ram, US-ah pawh hri leng hian ziaawm lam a la pan lo a, Ningani khan kai thar mi 65,551 hmuh chhuah leh niin ni khata hri kai hmuh chhuah tam ber ni a thleng leh a ni. US-a hian hri kai hmuh tawh hi mi 32,20,500 an tling tawh a, mi 1,35,828 in an thihpui tawh a ni. 

Hong Kong-ah chuan tualchhunga hri kai hmuh belh zel an nih avangin kar leh Thawhṭanni aṭangin school te khar vek a ni dawn. Ningani khan hri kai hmuh thar hi mi 42 an awm a, heng zinga 34-te chuan tualchhung aṭangin an kai a ni. Hei vang hian thuneitute chuan mipuia hri a darh leh tur venna atan school khar leh rih hi an rel a ni. 

Australia sorkar chuan an rama hri lengin zual lam a pan zel avangin an mi leh sa, ram dang aṭang haw a phalsak zat chu a tihniam. Prime minister Scott Morrison chuan kar tina ram dang aṭanga mi 8,000-te Australia-a an kir a phalsak ṭhin chu kar leh aṭang chuan mi 4,000 chinah a bithliah thar dawn tih a sawi. Ram danga aṭanga hawte hi sorkar dan siam angin ni 14 chhung inkhung hran zel tur a ni a, hemi atana senso pawh hi anmahnia an intum a ngai ang.