Malaysia leh NKorea inkar boruak ṭha lo

Malaysia rama North Korea ram hotu lu ber, Kim Jong-un-a unaupa, Kim Jong-Nam thah a nih chungchang chhuina kal zelah ram pahnihte inkar boruak a ṭha lo chho zel.

Kar kaltaa Kuala Lumpur airport-a Kim Jong-Nam thah a nihnaah hian NKorea mi panga an inhnamhnawih nia sawiin, Malaysia police-te chuan an zinga pakhat a man tawh a, midang pali-te chu thah a nih ni hian Malaysia an chhuahsan niin an sawi. Mahse NKorea chuan hei hi sawiselin, Kim Jong-Nam thah a nih chungchangah an ram tihhmingchhiat tuma cheah Malaysia hi a puh a ni.

Malaysia police-te chuan tualthahnaa inhnamhnawiha puh mi pali, hmeichhe pahnih leh mipa pahnih an man tawh a, an mante hi Vietnam, Indonesia, Malaysia leh North Korea mite an ni a, midang pali rinhlelhte chu zawn mek an nih thu an sawi.

Nimin khan Malaysia chuan an rama NKorea palai awm chu koin, an lungawi loh thu hi an thlen. NKorea lamin a puhna chu thu dik lo a nih thu pawh an hrilh bawk.

Kim Jong-Nam hi Macau pan a tum laiin, Kuala Lumpur international airport-ah tur hmanga tihhlum nia sawi a ni a, a thih hnu hian NKorea palaiin a ruang hi autopsy ti kher loa, an kuta hlan tura a ngenna chu Malaysia police-ten an hnawlsak a, hei vang hian ram pahnihte inkar boruak hi a ṭha lo chho ta a ni. NKorea ambassador Kang Chol chuan Malaysia sorkar­in Jong-Nam-a ruang a pek duh loh chhan hi South Korea lamin a nawr vang niin a sawi a, hei hi SKorea-in an ram tihhmingchhiat a tumna pakhat a ni, a ti.

Kim Jong-Nam hi kum 46 mi a ni a, China territory, Macau-ah khawsain, China-in venhimna a pe a ni. North Korea hruaitu, Kim Jong-un-a thuneihna chan chu chuhpui tumna a neih loh thu a sawi ṭhin a, hemi rual hian NKorea sorkar rorel dan hi vawi tam tak a sawisel fo tawh a ni.