Israel leh US-in team din an remti

Israel Prime Minister Benjamin Netanyahu chuan US President Donald Trump nen Palestinian ram an luah, West Bank-a Juda-te chenna tur in sak chungchang ngaihtuah tura team din an remti tih a sawi.

Pathianni kha cabinet meeting, Jerusalem-a an neihah PM Netanyahu hian US President Trump nena an inkawm chungchang a sawi a, thil hrang hrang ngaihtuah dun tura tunhmaa team an la din lohnaah din tharte an rel thu a sawi.

West Bank-a in sak chungchang ngaihtuahtu tur team an din chuan US leh Israel inlaichinna pawh a siamṭhat tur thu a sawi. Security, intelligence, cyber, technology leh economy lamah pawh thawhdunna an siam dawn a ni.

Netanyahu chuan Israel leh US inlaichinna ṭha tak chu President Trump nena meeting an neih hnuah a chak zual sawt niin a sawi. Kar kalta Nilaini khan Netanyahu leh Trump-te hian White House-ah meeting an nei a ni. Trump hian Israel leh Palestinian inkar buaina chinfelna tura US-in ram pahnih a siam a thlawpna nghet tak chu a thlak a, ram pahnih din kher chu buaina chinfelna kawng awmchhun nia a ngaih loh thu a sawi.

US sorkar hmasa khan Midde East buaina awm reng chinfelna tur hian Israel leh Palestinian ram hran din chu a ngai nia sawiin, hemi tur hian a nawr reng a ni. Mahse he ngaihdan hi Trump chuan a pawm bur tawh lo tih a sawi a, hemi rual hian Trump chuan Palestinian ram a luaha Israel-in Juda-te chenna tur in a sak chu chawlhsan rih tura a duh thu Israel PM hi a hrilh.