Mosul-ah naupang nuai thum chuang tangkhang

Save the Children chuan Iraq sipaiten Islamic State (IS) firfiak pawl laka beihpui an thlak mekna, Mosul khuaa civil mi tam tak tangkhang mek zingah naupang nuai 3.5 vel an awm tel niin a sawi.

Iraq rama Save the Children director, Maurizio Crivallero chuan Iraq sipai leh an thawhpui, US leh UK-te chuan naupang leh civil mite an himna tura theihtawp chhuah turin a ngen a, firfiakte kut aṭanga Mosul khawpui lak let tuma an beihnaah school leh hospital-te khawih tel lo hram turin a ngen.

Crivallero chuan khawpui chhunga cheng mi tam tak tan chuan tlan chhuah ngaihna a awm lo tih a sawi a, tlan chhuah tum eng emaw zat chu IS firfiakte hian an kaphlum a ni, a ti. Mahse khawchhunga chengte hian tui thianghlim, ei tur leh damdawite an tlachham ṭan tawh tih a sawi.

Iraq sorkar hian Mosul khawpui lak let tumin nikum October 17 aṭang khan beihpui a thlak a, kumin January 24 khan Mosul khawchhak lam bial chu sorkar kutah a awm tawh tih an sawi. Hun eng emaw chen an chawlh lailawk hnuah, Mosul khawthlang lam bial lak tumin Pathianni aṭang khan beihpui a thlak thar leh a ni.