Somalia khaw­pui­a bomb puak­ah mi 34 thi

Somalia khawpui, Mogadishu-a bazar hmunpuiah Pathianni khan bomb a puak a, mi 34 an thi a, mi dang 50 chuangin hliam an tuar. Bomb puak hian dawr eng emaw zat a tichhe bawk.

Eng pawl mahin bomb tipuaktu an nih thu an la sawi lo a, Somalia President Mohamed Abdulahi Mohamed chuan he pawikhawihnaa inhnamhnawihte man an nih theih nana an chanchin hriattir thei hnenah lawmman, US dollar 100,000 pek a tiam. President hian bomb puak vanga hliam tuarte hi damdawi-inah a tlawh nghal a ni.

Police hotu, Capt Mohamed Hussein chuan bomb tipuaktute hian civil mite an bitum ber nia sawiin, thi zinga ṭhenkhat phei chu tunge an ni tih hriat theih loh khawpin an kang nasa niin a sawi.

Bomb hi bazar restaurant bul car ding lai aṭangin tihpuah a nih thu district commissioner Ahmed Abdulle chuan a sawi.