Afghan hmeichhe TV presenter-te tana thupek siam hmang ṭan

Afghanistan-a rorel lai Taliban thuneitute chuan an ram hmeichhia, TV news anchor-te TV-a an lana an hmai khuh vek tura thupek a chhuah chu Pathianni aṭang khan a takin an hmang ṭan.

Taliban sorkar hian kar liam ta Ningani khan thupek hi a tichhuak a, mahse news outlet tlemte chauhin an zawm a ni. Hei vang hian Taliban Vice leh Virtue Ministry-te'n khauh zawka thupek an kenkawh hnuah Pathianni aṭang khan hmeichhe anchor tam zawkte chuan an hmai hi an khuh tawh a ni.

Information and Culture Ministry chuan an policy hi thutawp leh tihdanglam theih loh a nih thu an lo puang tawh bawk.

TOLOnews TV anchor Sonia Niazi chuan, "Pawn lam aṭangin nawr luih kan ni a, mask vuah turin min ti lui bawk a, hei hian programme kan neih laite min tibuai thei a ni," tiin hmai khuh chunga TV-a inlan ngai chu nuam a ti lo hle tih a sawi. "Islam sakhua chuan hmeichhiate chu kan hmai khuh turin thu min pe lo a, hetianga thupek an siam hi hmeichhe presenter-te tan pawh inrinlawk thiam a harsa hle a ni," a ti. "Islamic scholar leh politician langsar zawng zawng te'n he thupek hi an thlawp lo a ni," tiin a sawi.

Taliban chuan hmeichhe presenter te hian hmai khuhna aiah medical mask an hman a phalsak bawk tih a sawi a ni.