Pakistan PM hlui Imran Khan-a'n kawng zawh huaihawt tum

Pakistan prime minister hlui Imran Khan chuan inthlanpui neih ṭhat phutin naktuk hian an ram khawpui, Islamabad-ah kawng zawh pui tham tak huaihawt a tum.

Imran Khan hi kum thum leh a chanve chhung prime minister a nih hnuah tunhnai khan Parliament-ah no-confidence vote a paltlang zawh loh avangin PM a nihna aṭangin paihthlak a ni.

Paihthlak a nih hnuah, Khan hian khawpui ṭhahnem takah amah thlawptuten kawng an zawh chu a telpui tawh a,an thiltih theihzia lantirna kawng khat atan naktuk hian kawngzawh pui tham tak hi buatsaih leh a tum a ni. "Sorkar thar hi kan pawm thei ngai dawn lo a, Islamabad-ah hian eng anga rei pawh awm ngai se la, kan awm zel ang," tiin Khan chuan Pathianni khan Peshawar-ah a sawi.

Peshawar-a a party, Tehreek-e-Insaf hotute nen hun rei tak an inbiak hnuah he thutlukna hi a siam a ni. Khan chuan he kawngzawh hi an ram zahawmna vawn himna tur anih thu a sawi a, amah paihthlak a nih dan chu United States ruahman niin a puh bawk. A foreign policy chungchangah Russia leh China duhsak zawnga a chet avang leh Moscow-ah February 24 khan Russia president Vladimir Putin a hmuh avangin US chuan office aṭangin an paihtla tih a sawi a ni. US Department of state chuan Pakistan politics-ah inrawlhna a neih loh thu an sawi thung.

Khan chuan thuneitute chu khawpui lam pana an kawng zawh chu lo tibuai lo turin a ngen. Khawpui an luh hunah, prime minister chuan a lam ṭangte chu Parliament an ṭhiah hma loh leh inthlan an buatsaih leh dawn tih an puan hma loh chuan an awm reng tur thu a sawi.