Sri Lanka-in minister thar 8 lalut, Finance minister la nei lo

Sri Lanka president Gotabaya Rajapaksa chuan nimin khan a cabinet chu tihlen belhin, minister thar pariat a lalut leh a, mahse economy lama harsatna tawk mek ram hian finance minister erawh an la nei lo chhunzawm zel a ni.

Minister thar atana an lakluh te chu Minister of Fisheries atan Douglas Devananda Minister of Fisheries, Minister of Transportation and Highway leh Mass Media atan Bandula Gunawardana, Minister of Health and Water Supply atan Keheliya Rambukwella, Minister of Industries atan Ramesh Pathirana leh Minister of Agriculture, Wildlife and Wildlife Conservation atan Mahinda Amaraweera-te an ni.

Minister of Buddhasasana, Religion and Culture atan Vidura Wickramanayaka, Minister of Environmenta atan Naseer Ahamed, leh Minister of Irrigation, Sports and Youth atan Roshan Ranasinghe te lakluh an ni bawk.

President Rajapaksa hian kar liam ta Zirtawpni khan cabinet minister atan mi pakua a lo lalut tawh bawk a ni. Prime minister thar Ranil Wickremesinghe lakluh a nih aṭang kar khat chuang hnuah minister-te hi lakluh an ni.

PM hlui Mahinda Rajapaksa-a'n a lamṭangte'n sorkar laka lungawi lohna lantirtute kut an thlak avanga banna a thehluh hnuah prime minister vawi nga lo ni tawh, Ranil Wickremesinghe chu PM atan hian ruat thar leh a ni.