Mugabe-a’n kum 93 a tling

Zimbabwe President Robert Mugabe chuan nimin khan kum 93 a tling a, khawvela ram khat hruai­tu ni lai zinga upa ber a ni. Chak tawh lo hle mah se an ram roreltu nih chhunzawm zel a tum tih Mugabe chuan a sawi.

Robert Mugabe hian a piancham hi a staff-te nen Harare-ah nimin khan an lawm a, a lawmna pui ber erawh chu Inrinni khian Bulawayo khawpuia Matobo National Park-ah neih a ni ang. He hunah hian Mugabe-a party, ZANU-PF party mi leh sa ṭhahnem tak an punkhawm rin a ni.

Kum dangah pawh Mugabe piancham lawmna atan hian ran an talh nasa thei hle a, sai, lawi leh sazuk te an lo talh tawh ṭhin.

Mugabe chuan politics chawlhsan mai ala tum lo tih sawiin, ZANU-PF official-te pawhin amah thlaktu tur an la awm lo nia an ngaih thu a sawi. “Bang tura min duh a nih chuan party lam aṭagin min ngen mai dawn a, chutiang hun a thlen chuan ka bang mai ang” a ti. Mahse an party official-te chuan inthlana ding leh tura an la duh thu an sawi a, tlin tawh loa a inngaih hunah a hrilh mai dawn a, mahse tunah chuan ram hruaitu hna chelh tur hian a la tlin nia an ngaih thu an sawi.

Kum 1980-a Zimbabwe ram a din aṭang khan Mugabe hian ram hruaitu hna hi ala chelh chhunzawm reng a ni. A rorel chhung hian kawng hrang hrangin sawisel pawh a tawk nasa a, inthlan tichingpenah te puhin, an ram sum din­hmun tlakchhiat chhanah pawh mawh phurtuah puh a ni bawk. Ram hruaitu a nihna aṭanga chawl tawh tura nawr­na awm fo mah se, an party chuan nakkuma inthlanpui neih turah candidate atan dah leh an la tum a ni.