Africa ram pali-a naupangte dinhmun a ṭha lo
United Nations International Children’s Fund (UNICEF) chuan Africa ram pali-a naupang maktaduai 1.4 zette chuan eitur ṭha an neih loh avangin dinhmun ṭha lo takah an ding mek tih a sawi.
Nigeria, Somalia, South Sudan leh Yemen ram hmun tam takah ṭam a tlak avangin naupang tam tak ei tur mumal nei loin an awm mek niin, UN agency chuan a sawi a, heng mite ṭanpui tur hian chet chhuah vat a ngai a ni, a ti. UNICEF Executive Director Anthony Lake chuan chhiatna thleng tam tak chu mihringte siam a ni, a ti. Heng ram pali-te hian tualchhung buaina an tawk mek a, harsatna tawk mek mipui, a bikin naupangte ṭanpui turin khawvel ram hrang hrangte a ngen. Chet chhuah vat a nih chuan mi tam tak nunna an la chhanhim thei dawn a ni, a ti. UN Security Council ambassor-te chuan thla thar hian Africa ramte hi tlawh an tum.