US Secretary of State-in Mexico tlawh dawn

US Secretary of State Rex Tillerson chuan kar leh khian Mexico ram tlawh a tum a, a rual hian Homeland Security Secretary John Kelly pawh a tel ang.

Tillerson leh Kelly-te hian Mexico President Enrique Pena Nieto bakah official dangte an kawm dawn a, ni hnih an cham dawn niin State Department thuchhuah chuan a tarlang. Mexico ram hruaitute hi border security, dan kenkawh chungchang leh insumdawn tawnna lamte ansawipui dawn a ni.

January 20-a US President atana Donald Trump lakluh a nih hnu khan, President Trump hian campaign laia a lo tiam tawh angin US leh Mexico ramri hung hna chu a taka kalpui a ni dawn tih a sawi a, hei hian ram pahnihte inkar boruak a tihchhiat phah a, Mexico President-in US tlawh a tum pawh a ṭhulh phah a ni.

Trump chuan an ram chhim lama Mexico ramri chu hung vek a tiam a, ramri hungna sensote chu Mexico tum tir a tum thu a sawi. Hei bakah hian Mexico thil siam an lakluhte pawh chhiah sang tak chawitir a tum bawk a, ram pahnihten insumdawn tawnna lama inremna an lo siam tawh chu US in a hlawkpui theih dan tura siamṭhat a nih theih nan inbiakna neih leh a rawt bawk. Hei hi Mexico-in a remti lo a nih chuan sumdawnna lama an thawhdunna chu tihtawpah a lo vau tawh bawk.