Eiruk vangin Hong Kong hotu hlui a tang dawn

Hong Kong hotu hlui Donald Tsang chu eiruk thubuaiah thiam loh chantir a nih hnuin thla 20 chhung jail tang tura hrem a ni.

High Court Judge Andrew Chan chuan kum 2005-2007 chhung Hong Kong chief executive dinhmun lo chelhtu, kum 72 mi Tsang hremna tur hi nimin khan a puang. Judge chuan Tsang hi thla 30 chhung tantir a tum a, mahse a nungchang ṭhat vang leh Hong Kong tana a lo thlawh hlawk tawh avangin thla 10 a paihsakleh niin a sawi.

Tsang hi chief executive a nih laia a thuneihna dik lo taka hmanga puhnaah kar kalta khan thiam loh chantir a ni. Tsang hian Hong Kong sorkar aṭanga digital radio licence diltu, Wade Media company neitu, Bill Wong cho-bau-a luxury apartment a hmansak chungchang a puangzar lo nia puh a ni. He flat hi a thlawna chei sak vek a nih bakah, a hnuah a cheitu interior designer hi chawimawina pek a ni bawk nia sawi a ni. Tsang-a deputy, Chief secretary hlui Rafael Hui chu thamna pawisa dawngah puh a nih avangin kum 2014 khan jail-ah tantir alo ni tawh bawk.

Court thutlukna a puannaah, Judge Chan chuan Tsang-a anga dinhmun sang chelh tawh, hetianga tlachhia hi a la hmu lo tih a sawi. Hremna tur puan a nih hnu hian Tsang hi handcuff bun tirin hospital-ah hruai nghal a ni. A awm a nat avangin damdawi-inah hian enkawl mek a ni.