Kim Jong-nam thahnaah NKorea official inrawlhah puh

Malaysia police-te chuan North Korea ram hotu, Kim Jong-un-a unaupa, Kim Jong-nam thahnaah Malaysia-a NKorea embassy official a irawlh niin an sawi a, man tumin an zawng mek.

Kim Jong-nam hi kar kalta khan Kuala Lumpur airport-ah a thi a, police-te chuan tur hmanga tihhlum niin an sawi. Kim Jong-nam hi a unaupa, Kim Jong-un rorel dan ualau taka sawisel fo ṭhintu a ni a, hei vang hian thah a nih danah NKorea sorkar a inrawlh nia ngaihna pawh a lian hle.

Nimina Kuala Lumpur-a press conference neihah, Malaysia police hotu Khalid Abu Bakar chuan Kim thihnaa inhnamhnawiha an rinhlelh, North Korea mi pathumte chu an zawng mek tih a sawi a, heng mite hi an ram chhungah an la awm an rin thu a sawi.

Malaysia police-te’n an zawn mek zinga hian North Korea embassy-a second secretary, Hyon Kwang Song a tel a, midang pahnihte chu North Korea state airline Air Koryo staff, Kum Uk Il leh Ri Ji U-te an ni. Midang pali-te erawh chu Malaysia aṭangin NKorea ramah an tlanchhe hman nia sawi a ni. Malaysia police-te hian NKorea mi tho, Ri Jong Chol chu tualthahna thleng kaihhnawihah hian an man tawh a ni.

CCTV footage-ah airport-a King Jong-nam beih a nih dan hi a lang a, he video clip hi social media lamah a putru a ni. Video-ah hian Kuala Lumpur airport-ah hmeichhe pakhatin Kim hi a hnung lam aṭanga a pan lai leh, hmeichhe dang pakhatin man bet a tur ni awm tak an tat lai te, a hnuah an kalsawn san dante pawh a lang a ni.

Kim Jong-nam a ruang hi post-mortem turin lak a ni a, mahse nimin thleng khan result hi tihchhuah ala ni lo. NKorea sorkar chuan Kim ruang hi an kuta pe turin an phut a, a ruang endik tum pawh an duh lo tih an sawi. Mahse Malaysia chuan an rama thi a nih avangin a thih chhan dik tak hriat chu an tih tur niin a sawi thung.