Hmai tuamna hman ṭhatin Covid-19 a dan theih

National University of Singapore-a scientist-ten zirchianna an neihah, pawn chhuahnaah mipui 70% talin ṭha taka hmai tuamna an hman reng chuan Covid-19 hri leng chu dan theih a ni ang, an ti. He an zirchianna hi  Physics of Fluids chanchinbuah tihchhuah a ni. 

Hri darh tur danna atana hmaituamna hman a pawimawh thu an sawi rualin, zirchiangtute chuan hmaituamna atana puan hman leh eng chen nge hman a ni tih chuan awmzia a nei thui hle niin an sawi bawk. 

Zirchianna hi face mask hrang hrangah neih a ni a, awmzia a neih dante, mask hmang chungin hri kaiten an tidarh em tihte an zirchiang a ni. Hemi hnua report an siamah scientist-te chuan surgical mask-te hi mipui zinga 70% talin pawn an chhuahnaah an vuah reng a nih chuan hri leng hi tihbo theih a ni ang, an ti. Puan dang hmanga hmaituamna siam pawh chu vuah ṭhat a nih chuan hri darh zel tur a ven phah dawn hle a ni, tiin an sawi.