Hong Kong police-te’n kawng zawh

Hong Kong police-te chuan civil mite kut thlak nia puha police officer pasarih tantir an nih avanga lungawi lohna lantirin kawng an zawh.

Police officer pasarihte hi kum 2014-a democracy thlawpa kawng zawh zinga mi pakhat, activist leh social worker Ken Tsang chu kutkawl buntir a nih tawh hnuah kut an thlak nia puh vangin kar kalta khan thiam loh chantir an ni a, kum hnih jail tang tura hrem an ni.

Nilaini zana police-te’n kawng an zawhnaah hian 33,000 vel an tel niin kawngzawh huaihawttu, police association chuan a tarlang. Organiser-te chuan jail-a tang mek, police officer-te chu an thubuai ngaihtuah ṭhat a nih leh theih nan an pui zel dawn tih an sawi.

Police officer-te ukil pawhin nawrh huaihawt a nih lai hian, police officer-te chu mipui pungkhawmte chuan ṭawngkam mawi lo leh chhe tak takin an ankhum niin a sawi. Police officer-te hremna pek an nih dan chu a dik tawk lo hle a ni, a tibawk.

Hong Kong Junior Police Officers Assocation chairman, Chan Cho Kwong chuan mi tam takin police-te chu an hna avanga sawichhiah leh tihnawmnah pawh tuar thei zel turah an ngai a, mahse police lam chuan dan leh thupek palzut zawnga chete chu enliam leh ngaihzam mai an tum bik lo tih a sawi.

Police officer-te chuan an thawhpui mi pasarihte hremna pek chu a na lutuk nia an ngaih thu an sawi. Mahse court thutlukna puangtu, Judge David Dufton chuan police-te hna chu a hautakin a hahthlak hle tih an hriatthiam pui rualin, heng police officer pasarihte chet dan chu ngaihdam theih a ni lo tiin a lo sawi tawh a ni.