NKorea-in Kim Jong-­nam ruang endik duh lo

North Korea chuan Malaysia rama thah, NKorea ram hruaitu Kim Jong-un-a unaupa, Kim Jong-nam-a ruang endik tura zai, autopsy tih chu dan kalh a ni tiin, Malaysia thuneituten autopsy an lo ti chu na takin a sawisel.

North Korea Jurists Committee chuan Jong-nam-a ruang hi NKorea kutah Malaysia chuan a hlan mai tur a ni tiin, hetihlai aia a ruang endika autopsy leh forensic exam a lo nei chu dan kalh leh thil sual lian tak a ni, a ti.

Malaysia sorkar chuan Kim Jong-nam-a ruang enfiahnaah hian a chhungte DNA sample a la mamawh tih sawiin, a ruang hi a la pechhuak duh lo a ni. Hei hi NKorea chuan sawiselin, Malaysia lam chuan he thil thleng hi politics khelhna hmanruaah hman a tum niin a sawi.

Kuala Lumpur Airport-a Kim Jong-nam-a tur hmanga beitu nia puh, meichhe pahnih chu man an ni tawh a, pakhat hi Indonesia mi niin pakhat dang chu Vietnam mi a ni. CCTV footage aṭanga a lan danin hmeichhe pahnihte hian Kim-a hmaiah tur hlauhawm tak an hnawihsak niin a lang a, a hmain hetianga titur hian an lo zir lawk tawh nia sawi a ni bawk.