South Korea-ah KCTU in nawrh huaihawt

South Korea-a Korean Confederation of Trade Unions (KCTU) chuan nimin khan Trade Union Act siamṭhat phutin nawrh an huaihawt. 

Sorkar chuan an rama  Covid-19 hri leng thawh thumna thleng avangin ṭhulh turin a ngen a, social distancing dan palzutte chu na taka hrem an ni dawn tih a sawi bawk. Mahse KCTU chuan nawrh hi an huaihawt tho a ni. 

SKorea-ah hian kar liam ta aṭang khan ni tin coronavirus kai thar hmuh chhuah hi 300 an chuang ziah tawh a, hei vang hian health official-te chuan an ram khawpui Seoul leh a chhehvel bialah social distancing dan khauh zawkin an siam a ni. 

KCTU hian Trade Union Act siamṭhat an phut a, he Act hnuaiah hian hnathawktute chu an hnathawhna hmuna nawrh huaihawt khapsak an ni. Unemployed leh hna aṭanga ban tawhte chu labour union zawm phal turin he Act hi siamṭhat an phut bawk. 

Hri leng vangin Seoul khawpuiah chuan mi 10 aia tam punkhawm khap a ni a, hei vang hian Seoul-a nawrh huaihawtnaah chuan hmun khatah mi pakua chin chauh an awm. Mahse khawpui dang, social distancing dan thlahdul deuhna hmunah erawh chuan mi 30 chinte an awmkhawm thei thung. 

Health ministry thupuangtu Son Young-rae chuan nawrh huaihawtna leh a hnu leh zelah hri darh theihna hi a sang viau tih sawiin, mipuiten awmkhawmna tura zalenna an neihte zahsak an nih rualin, hri leng mek avangin midangte himna tura dan khauh zawka kenkawh a ngai a ni, a ti. 

Prime minister Chun Sye-kyun pawhin nawrh huaihawtte hian sorkar kaihhruaina siamte an zawm tur thu sawi mah se, tun hnaia an rama hri darh dan thlirin a ngaihṭhat thlak loh hle tih a sawi. 

Korea Disease Control and Prevention Agency chuan South Korea-ah hian Thawhlehni khan Covid-19 hri kai thar mi 349 an awm a, nimin khan hri kai thar mi 382 an awm belh tih a tarlang a, anni nen hian South Korea-a hri kai tawh zawng zawng hi mi 31,735 an ni a, he hri thihpui tawh hi mi 513 an awm tawh a ni.