Ukraine chunga an chetdan avanga lungawi lo United Nations-a Russia palai a bang

United Nations office, Geneva-a Russia palai Boris Bondarev chuan Russia-in Ukraine laka indona a kalpui zel avangin ualau takin a ban thu a puang.

Bondarev chuan Ukraine run a nih dan chu dan bawhchhiatna, thisen chhuahna, mawlna leh intihmualphona tiin a thuchhuahah a sawi.

"Kum 20 ram palai hna ka thawh chhung hian kan foreign policy chungchangah hian thil inthlak danglam tam tak a lo thleng tawh a, mahse kumin February 24-a thil thleng tluka ka ram ka zahpui kha ka la nei lo a ni," a ti.

Arms control and disarmament lama mithiam, Bondarev hian indona thlen chhan bul ber chu Russia president Vladimir Putin a nih thu sawiin a dem hle. "He indona thlentute hian thil duh pakhat chiah an nei - kumkhuaa thuneihna chan a, in ropui taka khawsak a,yatch-a nuamsa taka khawsak te a ni," tiin, heng an thil duhte tipuitling tur hian mi tam tak nunna hlan pawh an pawiti lo, Russia leh Ukraine mi sang telin an thihphah tawh a ni, tiin a sawi.

Bondarev chuan an rama diplomatic service leh Russia Foreign Ministry chetdan chu kum 1930 chhoa Soviet chetdan nen a tehkhin hial. "Ministry of Foreign Affairs chu ram leh ram inkara inpalai lam ngaihtuahtu pawh a ni tawh lo. Ram dang chunga tharum thawhna, dawt thu leh inhuatna lam hawi thlentu a ni tawh zawk. Mi tlemte tan chauh a thawk a, heng mite vang hian kan ram chuan enhran an hlawh a, kan ram hlutna pawh a tlahniam a ni," a ti.

"Russia hian thurualpui tur an nei tawh lo a, pawisak a neih loh vang leh ngaihtuahna thui tak an sen loh avangin anmahni bak dem tur an awm chuang lo a ni." tiin Boondarev chuan a sawi.