Afghanistan-a bomb puakah mi 14 an thi

Afghanistan-a Bamiyan khuaah Thawhlehni khan kawngsirah bomb pahnih tihpuah vangin mi 14 an thi a, thi zingah hian traffic police pakhat a tel bawk a ni. 

He bomb puak vang hian mi 45 velin hliam an tuar tih interior ministry thupuangtu Tariq Arian chuan a sawi. Dawr leh lirthei tam tak a chhe tel bawk. 

Afghanistan president hlui Hamid Karzai chuan bomb puak chungchang hi a dem thu a tarlang a, sorkar leh Taliban firfiakten remna leh muanna zawnga inbiakna an neih mek laia pawikhawihna a thleng leh chu a dem tak zet tih a sawi. 

Bomb tipuaktute hi tute nge tih hriat a la ni lo a, Taliban thupuangtu Zabihullah Mujahid chuan an pawl thil tih a nih loh thu a sawi. Bamiyan-a cheng tam zawk hi Shiite Muslim-te an ni a, Afghanistan-a Islamic State group-te chuan Shiite Muslim-te lakah indo hi an lo puang tawh a ni.