Ram 14-ah monkeypox darh tawh; vaccine enchhinna nei mek

Covid-19 vanga kum thum dawn ram hrang hrangte an buai hnuah, tun hnaia hri leng darh mek, monkeypox chuan ram eng emaw zat a tibuai leh mek. Monkeypox hi West leh Central Africa ramah hmuhchhuah tam ber a ni a, Europe leh ram dangah hmuh ni tawhin, ram 14-ah a darh tawh a ni.

World Health Organisation (WHO) chuan hri leng darhna ramah hian hri zirchianna kalpui an tum bakah khuahkhirh dan turte an sawiho nghal dawn tih a sawi. WHO hian hnu chhui, testing, hri laka invenna leh hri leng khuahkhirh dan kawngah kaihhruaina a siam.

Hetihlai hian, ram ṭhahnem tak te chuan hri leng khuahkhirh dan dapin thupek an siam mek bawk.

UK Health Security Agency (UKHSA) chuan taksain natna a dona kawnga chak lo, immunosuppressed, hmeichhe raipuar leh naupang kum 12 chin hnuailam te chu khawsik emaw hri kai nia rinhlelhte emaw hnaiha awm lo turin a ngen. Hri kai nia rinhlelh nena intawk palh te chu vaccine pek an ni a, ni 21 chhung chu inkhunghrang tura thupek an ni.

Khawvel ram zingah Belgium chu monkeypox kai te ni 21 chhung inkhunghrang tura thupek tichhuak hmasa ber a ni. Health official-te chuan hri leng nena inkungkaihna nei emaw a hri kaite emaw chu kar thum chhung an inkhunghran a ngai dawn a ni, an ti.

Vaccine chu hri leng dona atan a ṭha tawk em tih enchhinna neih mek a ni. Canada sorkar chuan monkeypox laka invenna atan smallpox vaccine chu hman theih a ni dawn em tih an enchhin mek bawk.

US president Joe Biden chuan monkeypox darh mek chu mipui ngaihven ngai khawp a ni, a ti. US health official-te chuan hri laka invennan vaccine hrang hrang enchhinna an nei mek tih Reuters chuan a tarlang.

Hetih lai hian, USA-a CDC chuan mipuite zin veivah danah khuahkhirhna thar an tichhuak.

Spain-a Madrid region-ah pawh hri hi hmuhchhuah niin, regional sorkar chuan hri kai tamna nia rinhlelh 'sauna' ho an khar tir tawh a ni.