Sri Lanka-ah fuel manin record siam Petrol litre 1 Rs 420, diesel Rs 400

Economy lama talbuai mek Sri Lanka chuan nimin khan ramchhunga an petrol man chu 24.3% leh diesel 38.4% in an tihsan belh leh a, fuel man sanna hian record a siam hial.

April 19 hnua fuel man vawi hnih an tihsan hnuah, Octane petrol chu litre khatah Rs 420 leh diesel Rs 400 man a ni tawh dawn a, an ram chanchina fuel man a san ber ṭum a ni.

Fuel man tihsan a nih thu hi fuel laluttu, Ceylon Petroleum Corporation (CPC) chuan fuel man thar tur hi ennawnin, hei hi cabinet chuan a pawm a ni. "Cabinet hian transportation leh service charge dangte pawh a remchan dan angin a siam danglam nghal a ni. He dan hi chawlhkar hnih emaw thlatin emaw siam dang lam a ni," tiin power and energy minister Kanchana Wijesekara chuan a sawi.

Auto-rickshaw khalhtute chuan fuel man tihsan a nih avangin fare pawh km khatah cheng 90-in an tisang a, a km dawt leh aṭangin cheng 80-in an ti sang dawn a ni. Fuel man sang zel chhawk zangkhaina turin sorkar chuan institution-a hotute chu an hnathawk ṭhenkhat, hnathawk tura pawn chhuah ngai lote chu an in lam aṭanga hna thawh tir turin a ti.

Sri Lanka hian foreign reserve an neih tawh loh avangin ram pawn aṭangin nitin mamawhte pawh an lalut thei tawh lo a, hei vang hian ei leh bar lamah pawh indaihlohna an tawk mek. Thil man a sang chak hle bawk a, thil man sanna hi 40% a tling ṭep tawh a ni.