Thailand-a lal rorelna International right group-in sawisel
International rights group, International Federation for Human Rights chuan Thailand lal rorel dan sawiselin,an lal King Maha Vajiralongkorn sawisel zawnga nawrh huaihawtte chunga sorkar thiltih dan chu an dem tih a sawi.
Lal thuneihna tihnep duh pro-democracy zinga hruaitu mi 15-te chu thu zawhfiah tura lak an ni a, heng mite hian September leh October thla khan an lal nungchang, nundan phung leh a hun hmandan an sawichhuah avangin thuneitute chuan thu zawhfiah turin an ko a ni.
Hemi chungchangah hian International Federation for Human Rights chuan lese-majeste law chu lungawi loa nawrh huaihawt, pro-democracy hruaitute dan bawhchhiaa puhna atana hmang lo turin an duh tih an sawi. Human rights lawyer, Amul Clooney chuan sorkar official emaw, sorkar kalphung emaw sawisel vang ngawtin mi man leh hren an ni tur a ni lo, a ti.
Hetih lai hian sorkar thupuangtu, Rachada Dhnadirek chuan he sawiselna hi chhang letin, "Sorkar chuan rilru zau takin mipuiten dikna leh zalenna an neihte zahsak chungin, sorkar leh lal sawiselna nasa tak awm ṭhin pawh a lo enliam tawh ṭhin. Sorkar chuan a thuneihna hi a hman a ngai tawh a ni," a ti thung.
Lese-majeste law hi kum 2018 aṭang khan hman a ni ngai lo a, mahse June thla aṭang khan nawrh huaihawtten lal thuneihna tihnep an duh vangin prime minister Prayuth Chan-ocha chuan hman leh a nih thu a sawi a, hei hi lal ngenna avanga hmang an ni lo tih a sawi bawk.
July thla aṭang khan Thailand-ah hian zirlaite kaihhruaiin PM bang tura phut leh, lal thuneihna tinep tura ram danpui siamṭhat phutin nawrh huaihawt a ni.