VX Nerve agent hmangin Kim Jong-nam tihlum niin Police ten sawi

Malaysia police-te chuan North Korea ram hotu, Kim Jong-un-a unaupa, Kim Jong-nam chu tur hlauhawm tak, vun chhunga lut thei, VX nerve agent hmanga tihhlum a nih thu an sawi.

Kar hmasaa Kuala Lumpur airport terminal-a tihhlum, Kim Jong-nam thih dan hi Malaysia police-te cuan an chhui mek a, he tualthihna thlengah hian North Korea sorkar a inrawlh nia puh a ni.

Malaysia inspector ge­neral of police Khalid Abu Bakar chuan, Kim Jong-nam thahna atana an hman chemical chu an enfiah hnuah VX nerve agent a nih finfiah a nih thu a sawi. He tur hi Kim-a hmai leh mitah te an tat a ni.

VX hi chemical thawk chak leh hlauhawm tak a ni a, vun chhunga a lut chuan a hlauhawm hle niin US Centers for Disease Control and Prevention chuan a sawi. Vuna a luh aṭanga second reilotea a thawk nghal a, tihfai nghal a nih loh chuan minute reilote aṭanga darkar 18 chhung­in an thihpui hman niin CDC chuan a tarlang.