White House Correspondents’ dinner-ah Trump tel dawn lo

US President Donald Trump chuan April 29-a White House Correspondents’ Association zanriah buatsaih turah a tel dawn lo tih a puang.

Kumtina buatsaih ṭhin, White House Correspondents’ Association dinner-ah hian US President hi an tel ziah ṭhin a, journalist, politician leh mi larte an tel ṭhin a ni.

White House chuan media mi, nitina a kawm ṭhin zinga eng emaw zat chu kar kalta Zirtawpni khan a ban a, a ban zingah hian CNN, The Washington Post, New York Times leh Associated Press pawh an tel. White House Press Secretary Sean Spicer-a’n media mite a kawmnaah hian BBC, CNN, Buzzfeed leh New York Times-te chu tel phalsak an ni lo bawk.

White House Correspondents’ Associaton chuan White House tlutlukna siam hi na takin a sawisel a, President Trump chu media zinga duhsak bik neiah an puh. Hemi hnu hian Trump chuan dinner an buatsaih turah a tel dawn lo tih a puang a, mahse zanriah buatsaih tur atana duhsakna a hlan thu a sawi nghal.

Kum 1924 aṭang khan US President ṭanglaite chu White House Correspondents’ Association dinner-ah hian an tel ziah a, thu sawitir an ni ṭhin. President kalchhuak ta, Barack Obama pawh kha ṭum riat a tel hman a ni. Nikuma dinner buatsaihah khan Trump pawh hi a lo tel tawh a ni.

President hlui Ronald Reagon chu kum 1981 khan White House Correspondents’ Association dinner-ah hian a tel lo a, hei hi kah a nih vang a ni a, mahse dinner neih lai hian telephone-in a be tho a ni. Kum 1972-a dinner buatsaih a nih ṭum khan Richard Nixon chu a lo tel lo tawh bawk.