Kim Jong-nam thattu dollar 90 pe

North Korea ram hruaitu, Kim Jong-un-a unaupa, Kim Jong-nam chu tur hlauhawm tak,VX nerve agent hmanga tihhlum a nih thu puan a nih hnuah, a thattu ber nia rinhlelh, Indonesian hmeichhia pakhat chuan hemi atan hian US dollar 90 pek a nih thu a sawi.

Kum 25 mi, Siti Aisyah-i chuan thu an zawhfiahnaah, Kuala Lumpur airport-ah Kim Jong-nam chu a hmaiah hriak hnawih tura tih a nih thu leh, hei hi infiamna lam thil anga a ngaih thu a sawi. Mahse Kim-a hmaia a tah hi tur hlauhawm tak, VX nerve agent a ni a, hei vang hian a hnu reilotah Kim Jong-nam hi a tih ta a ni. Malaysia police-te chuan Aisyah-i leh thurualpui, Vietnam hmeichhe pakhatte chuan an thil tih chu an hrechiang niin an sawi thung.

Kim Jong-nam thahnaah hian North Korea sorkar chu a inrawlh nia rin a ni a, mahse hei hi NKorea lam chuan a pha thung. Kim Jong-nam hian a nau, Kim Jong-un thuneihna hi chuhpui tum lo mah se, NKorea sorkar inrelbawl leh rorel dan chu na tak takin a lo sawisel fo tawh a ni.

North Korea chuan Kim Jong-nam-a ruang hi pe thuai turin Malaysia sorkar a phut a, a ruang endik a ni pawh chu a sawisel bawk. Mahse Malaysia police-te chuan Kim hi an ram chhunga thi a nih avangin a thih chhan chhuichhuah chu an mawhphurhna niin a sawi thung. Malaysia chuan Kim thah a nih chungchanga sorkar leh police-te hnathawh sawichhe zawnga thu sawi leh, dik lo taka sorkar puh a nih chuan, NKorea palai, Kang Chol chu an ram aṭanga hnawhchhuahah a lo vau tawh bawk.