SKorea president thlawptu leh duh lo tuten kawng an zawh

South Korea president aṭanga chawlhtir tum mek, Park Guen-hye-i thlawptu leh duh lo tute chuan kar kalta Inrinni khan Seoul-ah kawng an zawh.

Pawl pahnih kawng zawhte hi an intihbuai lohna turin police 17,000 vel zet duty tir an ni a, police-te chuan an motor hmangin daidanna an siam a ni.

Park-i duh lotute chuan balloon eng leh banner-te kengin, hmun thum aṭangin kawng an zawh a, hlawm khat chuan president chenna Blue House panin kawng an zawh a, hlawm khatin Constitutional Court an pan a, a hlawm thumna chuan Chaebols headquarters panin kawng an zawh bawk.

Eirukna leh thuneihna dik lo taka hmanga puh a nih avangin nikum December thla khan Parliament chuan Park-i hi president aṭangin a chawlhtir a, president a nihna aṭanga ban hlen a nih dawn leh dawn loh chungchang ngaihtuah mek a ni a, Constitutional Court chuan thutlukna hi a siam dawn a ni.

Constitutional Court hian vawiinah Park-i chungthu hi a ngaihtuah chhunzawm dawn a, March 13 hmain thutlukna a siam beisei a ni. Court-in ban tura nawrna hi a thlawp a nih chuan, Park-i hi president a nihna aṭangin ban nghal a ni ang a, ni 60 chhungin president thar thlanna buatsaih a ni zui bawk ang.