Hamas-te’n Israel PM rawtna an hnawl

Israel Prime Minister Benjamin Netanyahu-a’n Gaza Strip-a international force thawn luh a rawtna chu Gaza-a roreltu, Islamic Hamas pawl chuan an hnawl.

Gaza-a Hamas thupuangtu, Abdulatif al-Qanou chuan thuchhuah siamin, Gaza Strip-a international force thawn luh chu thil hlauhawm tak a ni tiin, an pawm thei lo tih a sawi.

Israel PM Netanyahu hian Pathian­ni zinga Australia Foreign Minister Julie Bishop-i nen, Jerusalem-a an inkawm ṭumin he rawtna hi a siam a ni. Netanyahu chuan Israel sipaite chuan West Bank pum chu an thunun a ngai tih a sawi a, hei bakah hian Gaza security dinhmunte enfiah tur leh, firfiakte chungchang buaipui tura international force tirh luh a rawt a ni.

Mahse Hamas chuan hei hi an duh lo tih sawiin, Gaza Strip-a ramdang sipai tirh luh hrim hrim chu an duh lo a, tirh luh an nih chuan Gaza chhunga sipai awmte tan a him dawn lo a, an pawm thei dawn lo tih an sawi.

Hetih lai hian Israel sipaite chuan Hamas-te hian Israel beihna atana hman an tum, ramri kaltlanga leiverh siam 15 lai an nei mek niin an sawi. Hebrai ṭawnga tihchhuah, Channel 2 chuan kum 2014 July - August thla chhung khan Israel sipaite hian Palestinian firfiak pawlte leiverh dapchhuah leh tihchhiat hna hi thawk mah se, tun hnaiah Hamas-te hian leiverh siam hna hi an chhunzawm leh niin a tarlang.