Egypt-ah Kristiante tlanchhia

Islamic firfiakten Egypt khawchhak lam, Sinai biala Kristiante an beih fo avangin Kristian eng emaw zat himna zawngin an tlanchhia a, Egypt sorkar chu sakhaw tlem zawkte venghim zo loah an puh.

Sinai hmarlama el-Arish khuaah kar kalta chhung khan Kristian eng emaw zat thah an ni a, hei vang hian mi tam tak chu khua aṭang hian Ismailia khuaah an tlanchhe tawh a ni. Tlanchhiate hian Islam firfiakte chuan an hmai tuamin, ralthuam nen Kristiante an zawng tawp niin an sawi. Firfiakte hian Kristiante chu thlamuang taka awmtir an tum lo tih sawiin, Islamic state din an tum niin an sawi. Al-Arish khua aṭang hian Kristian hi 100 chuang an tlanchhe tawh a ni.

Egypt rama mipui zinga 10% vel chu Coptic Kristian an ni a, mahse Kristiante hian Islam firfiakte beih an tawk fo ṭhin. Kum 2013-a sipai chakna hmanga Islamist president paihthlak a nih hnuah khan Kristiante Biak-in beihna a thleng ngun hle bawk. Kristiante hian president hlui paihthlatu, sipai hotu hlui leh tuna an ram president ni mek el-Sissi an thlawp a, hei vang hian Islam firfiakte beihna an tawk ngun zual hle.

Kum 2011 hmalamah khan Sinai hmarlam bialah hian Kristian 5,000 vel an awm a, mahse beih an tawh fo avangin an zinga tam tak an tlanchhe tawh a, tunah hian Kristian 1,000 vel chauh an awm tawh nia sawi a ni.