Germany-a refugee-te’n beih an tawk ngun

Germany rama raltlan awm zinga mi 2,500 chuang chuan nikum chhung khan beih an tawk niin, interior ministry report chuan a tarlang.

Pathianni-a ministry-in report a tihchhuahah, police-te’n an record danin nikum chhung khan raltlan, pem lut leh an awmna hmunte chu ṭum 3,500 chuang beih a ni a, nikhatah tharum thawhna hi ṭum 10 dawn thleng ang a nih thu tarlan a ni.

Pawikhawihna thleng vang hian mi 560-te’n hliam an tawrh phah a, an zingah hian naupang 43 an tel.

Interior ministry chuan mi tam tak, an awmna ram buai leh indona thleng vanga Germany rama tlanchhiate chuan him taka awm an thei an beisei a ni, a ti.

Kumin February thla khan German neo-Nazi pakhat chu refugee-te tana sport hall sak a hal avangin kum riat tang turin hrem a ni. A thil halchhiat hlutzawng hi dollar maktaduai 3.7 vel a tling.

Germany hi Europe ram zinga raltlan la lut tam ber a ni a, kum 2015 chhunga raltlan lut zat chu 890,000 an tling a ni. Mahse kum 2016-ah chuan Balkan-in a ramri a khar avang leh, EU-in raltlan semrual dan turah Turkey inremna a siampui avangin raltlan lut zat hi an tlahniam hle a, mi 280,000 an lut a ni.