Texas-a Primary School-a inkahna thlengah mi 21 thi

Uvalde khua, Texas, United States-a awm Robb Elementary School-ah kum 18 mi, Salvador Ramos chu an ram huna Thawhlehni khan ralthuam nen lutin, silai vawi tam tak a hmehpuah hnuah enforcement lamin an kaphlum tih official-te chuan an sawi.

Robb Elementary School-a silai pawng kahna thleng avang hian mi 21 an thi a, an zingah naupang 19 an tel. Puitling pahnih thi zingah hian school-a zirtirtu pakhat a tel. Mi eng emaw zat an hliam bawk.

Investigator-te chuan pawikhawihtu hian handgun, AR-15 semi automatic rifle leh high capacity magazine a keng tih an sawi. School-a pawikhawihna a thlen hma hian a pi pawh a kap niin an sawi.

Uvalde-a consolidated independent school district-a police hotu Pete Arredondo chuan inkahna hi an ram huna Thawhlehni chhun dar 11.32 bawr vela thleng ṭan a nih thu leh, pawikhawihtu hian thurualpui dang a nei lo nia a lan thu a sawi bawk.

Texas governor Greg Abbott chuan silai hmetpuaktu hian a lirthei chu kalsanin school lam hi a pan a, a pawng kah ta chiam niin a sawi. San Antonio khawpui aṭanga km 135 vela hlaa awm Hispanic luh tamna school-ah hian naupang 500 bawr vel an kal mek a, pawl 2-4 zirlai, kum 7-10 inkarte an ni.

US president Joe Biden chuan ramchhunga silaia inkahna thleng ṭhin chu a ninawm zozai tawh takzet tih sawiin, silai khuahkhirhna dan khauh tak siam a ṭul thu a sawi leh. "Naupang engzatin nge he thil thleng hi hmu a, an ṭhiante thi lai hi mi engzatin nge hmu?. Indona hmuna awm ang mai an ni," tiin "An damchhungin sernung an nei tawh dawn a ni," a ti.

White House bakah US-a sorkar building dangah teUvalde-a nunna chante sunna lantirnan an ram flag chu a ngul chanvea zar turin President Biden chuan a ti bawk.

District-ah hian vawiin hi school kal tawp ni tur a ni a, mahse pawikhawina thleng avang hian nimin aṭang khan class leh activity dangte chu tihtawp nghal a ni.

US-ah kum 2020 chhung khan silaia inthahna vawi 19,350 a thleng a, kum 2019 nena khaikhinin 35% dawnin a sang tih Centers for Disease Control and Prevention (CDC) data thar ber chuan a tarlang.

Kumin chhung hian silaia inkahna ṭum 212 a thleng leh tawh tih Gun Violence Archive chuan sawiin, hengah te hian pawikhawihtu tiam lohin mi pali emaw a aia tam chu kah hliam emaw thah emaw an nih thu a sawi.