Pakistan sorkarin Imran Khan-a kawngzawh tum a khapsak

Pakistan sorkar chuan prime minister aṭanga paihthlak tak ,Imran Khan-a'n politics leh economy lama harsatna an tawh mek karah inthlan ṭhat phuta lungawi lohna lantirna kawngzawh buatsaih a tum chu khapsak a ni tih Thawhlehni khan a sawi.

Interior minister Rana Sanaullah chuan Khan-a party official-in police pakhat a kaphlum nia sawi hnuah, kawngzawh neih an tum khap a nih thu a puang a ni.

Khan hian thla hmasa khan an ram Parliament-ah fiahna a paltlang zawh loh avangin PM a nihna aṭang paihthlak a ni. Mahse a kaihhruai paihthlak a nihnaah hian US chu inrawlhah a puh, an ram chhung hmun hrang hrangah lungawi lohna kawngzawh an lo buatsaih tawh bawk.

Hetih lai hian sum lamah harsatna lian tak a tawk mek a, foreign reserve pawh USD tld 10.5 hnuai lamah a tla thla tawh a, thla hnih chhunga bungrua an lakluh theihna tur chauh a ni tawh. Prime Minister aṭanga Khan paihthlak a nih hnuah a thlaktu atan a ruat, Shehbaz Sharif chuan an ram economy siamṭhat tum hian hma a la mek a, mahse thutlukna lian tham erawh engmah a la siam lo.