NKorea-in missile 3 kapchhuak

North Korea chuan an ram khawchhak tuipui aṭangin missile pathum an enchhin leh a, heng zingah hian intercontinental ballistic missile (ICBM) pawh a tel thu South Korea leh Japan sorkar chuan nimin khan an puang.

South Korea-a Joint Chiefs of Staff (JCS) chuan missile kahchhuah hmasak ber hi NKorea khawpui Pyongyang-a Sunan area aṭangin nimin zing dar 6 khan kahchhuah a nih thu a sawi. Missile pahnihna hi minute 37 hnu lawkah kapchhuakin, minute nga hnuah pathumna hi kahchhuah leh a ni. Missile an kahchhuah hmasak ber hi ICBM a nih theih thu leh, km 360 vela hla a thlawk a, a thlawh san lai berin km 540 a thleng phak niin an sawi.

Missile hi an kapchhuak a ni tih an nemnghet a nih chuan Kim Jong Un-an kum li liamtaa long range missile kapchhuak lo tura inremna an siam a bawhchhiat hnua NKorea-in ICBM a kahchhuah ṭum hnihna tur a ni.

Missile pahnihna hi km 20 a sang a thlawh hnuah a chhe zui tih military chuan sawiin, missile pathumna short-range ballistic missile nia rin erawh km 760 a thui leh km 60 thlenga sangin a thlawk tih an sawi.