Russia-in sipaia ṭang thei kum bithliah siam titawp

Russia parliament chuan sipaia ṭang thei chin kum upat lam bithliah a siam chu a titawp. Hei vang hian Ukraine-a beihpui a thlak meknaah sipai pawh tam zawk a lakluh belh thei dawn a ni.

Dan an hman mekah, Russia mi kum 18-40 inkar, rampawn mi kum 18-30-te chu Russia sipaiah hian an lut thei a ni.

Sipai lut thei chin, upper age limit tihtawpna bill hi Parliament lower leh upper house chuan thlawpin, 'law' a chantir a nih theihna atan president Vladimir Putin-a'n a lo pawmpui turin thawn thuai a ni ang.

Russia hian February 24-a Ukraine an run aṭangin a sipai 1,000 chuang a chan tawh niin a sawi. Ram dangte'n Ukraine a run nia an sawi laiin, Russia chuan he inbeihna hi 'special military operation' tiin a sawi thung a,an tum an hmuh hma chuan chawlhsan an tum loh thu chiang takin an sawi tawh a ni.

Parliament speaker Viacheslav Volodin chuan, "Armed Forces lam kan thuam chak a ngai dawn a, chumi tur chuan Defense Ministry kan ṭanpui a ngai a ni, tiin "Kan Supreme Commander-in-Chief hian kan sipaite'n hnehna an chan ngei theihnan, chak zawka hma la turin kawng engkimah theihtawp a chhuah a ni," a ti.

Russia-in Ukraine khawchhak lam bei zel
Russia sipaite chuan Nilaini khan Ukraine khawchhak lam, Donbas region-a khawpui pahnih chu bei lehin, civil mite tlanchhuahna kawng pui ber chu khar sakah a vau.

Ukraine khawpui Kyiv leh an khawpui lian ber dawttu Kharkiv an laksak theih loh hnuah Russia chuan Donbas region-ah thuneihna pumhlum lak tumin ṭan an khawh mek a ni. Donbas bialah hian sipai ṭhahnem tak a tir lut a, Sievierodonetsk leh Lysychanskkil-a Ukraine sipaiten khawpui an dan mekna lai chu hmun thum aṭanga rawn beiin lak tumin an nawr mek a ni. An laksak thei a nih chuan Luhansk province chu Russia thuneihna hnuaiah a awm tawh dawn a, Russia-in indo an kalpui chhan ber pakhat chu a hlawhtling dawn a ni.

Lysychansk-a police-te chuan Russia sipaite beihna avanga thi ruangte chu lakkhawm hna an thawk mek a, hmun khatah a hlawma phum an ni dawn tih Luhansk-a regional governor Serhiy Gaidai chuan a sawi. Mi 150 vel chu Lysychansk district-ah hian phum an ni tawh a ni.