Imran Khan-a'n inthlan buatsaih turin ni ruk chhung sorkar hun a pe

Pakistan prime minister hlui Imran Khan chuan Pakistan sorkar chu ni ruk chhunga inthlan ṭhat an buatsaih lo a nih chuan mipui maktaduai chuangte nen an khawpuiah kawngzawhna lian tham tak an huaihawt tur thu a sawi.

Khan hian nimin khan Islamabad-a mipui sang chuang kalkhawm hmaa thu a sawiah, a rang thei ang bera inthlan buatsaih turin sorkar a nawr. "Sorkarin assembly ṭhiata inthlan ṭhat a puan hma loh chuan heta awm reng tur hian thutlukna ka siam tawh a, mahse darkar 24 liam ta chhunga thil thleng ka hmuh danah chuan kan sorkar hian awmze nei loa min kaihhruai an tum a ni," tiin kum 69 mi Khan hian a sawi a ni.

Hetih lai hian Khan leh a lamṭangten kawng an zawh hma hian Pakistan sorkar chuan an building pawimawh ho, parliament bakah president leh prime minister Shehbaz Sharif-a office-te chu veng turin sipaite chu thu a lo pe lawk vek a ni.

Khan hian Peshawar aṭanga ṭanin, Islamabad panin kawng hi a zawh a ni. Lahore khawpuiah riot police-ten Islamabad pana kawngzawh turte hi dan an tum a, buaina chhuakin police-te hian tear gas te an hmang. Islamabad-ah pawh Khan-a thlawptute leh police-te an intibuai bawk. Khan hian Islamabad khawpui hmarthlang lam, km 100 vela hla chu helicopter hmangin a tlawh a, thil thlen danah police-te chu a dem thu sawiin amah ṭantute chu rally zawm ve turin a sawm nghal.

Pakistan sorkar chuan kawngzawh huaihawt tum hi a lo khap a, mahse Khan leh a lamṭangte hian an zawh lui ta tho a ni. Nilaini khan sorkar lam hian beihpui thlakin, Khan thlawptu mi 1,700 chuang zet an man. Prime minister Shehbaz Sharif kaihhruai sorkar chuan nawrh huaihawtte chu an ram ṭhendarh tum leh buaina chawh chhuah tumah puhin, Islamabad an lut tur chu dan tlat an tum tih a sawi.