Palestine-in flag march ṭhulh turin Israel ngen

Palestinian thuneitute chuan Nilaini khan Israel sorkar chu Pathiannia sawisel hlawh tak flag nena kawngzawh, flag march huaihawt a tum chu ṭhulh turin a ngen.

Palestinian president thupuangtu, Nabil Abu Rudeineh chuan East Jerusalem lama Islam mipui paltlanga Israel flag kenga kawngzawh chuan buaina leh tharum thawhna a thlen a hlauh thu a sawi.

"Israel chuan Palestinian mipui leh an hotute tumruh zia an hrechiang lo a ni" tiin Abu Rudeineh chuan a sawi. Israel sorkar chu buaina leh tharum thawhna a thleng a nih chuan mawhphurhna pumhlum an chang dawn a ni," tiin "Palestinian-te chuan Jerusalem-a Islam leh Kristian sakhaw thil pawimawhte a venghim thei a ni," a ti.

Nilainia Israeli media tarlan danin, Israel police-te chuan Pathiannia flag march vanga buaina chhuak awm palh thulhah state of alert an puang. Kar hmasa khan, Israel police-te chuan flag march neihna tura kalkawnga ruahman, Damascus Gate leh East Jerusalem lama Islamic Quarter thleng kal phalna an lo pe tawh a ni.

Kum 2021, May thla khan flag march vang hian Gaza strip-ah Israel leh Islamic Resistance Movement (Hamas)-te chu ni 11 chhung an lo inbeih phah tawh a, Palestine mi 200 leh Israel mi 10 chuangte'n an thih phah a ni.