Trump-an defence tana sum hman tihpun a rawt
US President Donald Trump chuan kum 2018 budget tura rawtna a siamah, defence lam tana sum hman chu 10% a tihpun a rawt.
President Trump-a rawtna ang chuan defence tana sum hman hi dollar tluklehdingawn 54-a tihpun a ni ang a, a punna tur hi thil dang atana an hmanral ṭhin aṭanga pawh hek tum a ni thung. A bikin ramdangṭanpuina sum an pek ṭhinte aṭanga pawhhek a rawt a ni.
President chuan ruahmanna a siam chungchangah hian sorkar agency hrang hrangte a be rawn a, a budget ruahman hi May thlaah Congress-ah a pharh ang.
President thlan dawna sipaite thuam chakna tura sum tam zawk pek leh an hamṭhatna tur programma ṭha zawk duan a lo tiam tawh angin, Trump chuan a budget pharh turah hian sipaite thuam chakna, ram himna leh sum leh pai lama US hmasawnna turte chu ngaih pawimawh a nih tur thu a sawi.
Trump chuan kawngpui leh rel kawng siamna turah sum ṭhahnem tak dah a ni bawk dawn tih a sawi a, mahse chhiah lak a tum dan erawh a la sawilang lo. Trump hian a campaign laiin chhiah lak tihhniam hi a lo tiam tawh a ni.
US hian leiba tam tak a nei mek a, a leiba neihsa belhchhah loa defence lama sum hman dollar tld 54 zeta tihpun a nih dawn chuan kawng danga sum hman ṭhin pawhpen hi a ngai dawn a ni. Environmental Protection Agency tana sum dah pawh nasa taka tihhniam a ni dawn nia sawi a ni.
US hian ram dang zawng aiin defence tan sum a seng hnem ber a, defence bikah kum khat atana a sum hman hi dollar tluklehdingawn 600 vel a ni.