Russia-in Syria hrek tumna veto tum

Russia chuan Syria-a chemical ralthuam hmanga inbeihna thlenga inhnamhnawiha puh mimal, pawl leh company-te hrekna tur UN resolution chu a thuneihna hmanga lo dan, veto a tum.

Khawthlang ramten an thlawp, UN Security Council draft resolution-ah hian ram hrang hrang ten helicopter hmanga Syria sorkar hnena supply an pek ṭhin khap tum a ni. Investigator-te chuan Syria sorkar hian sorkar eptute chu tur hmangin a bei niin an sawi.

UN resolution hi Britain leh France rawtna anga siam a ni a, US pawhin tun hnaiah a thlawp a ni. UN-a France ambassador, Francois Delattre chuan Syria hrek a pawimawh zia hria a, US-in an rawtna a thlawp chu lawmawm a tih thu a sawi. British ambassador Matthew Rycroft pawhin ram pathumten inbeihna hmanrua atana chemical ralthuam hman an duh loh zia lantirna pawimawh tak a nih thu a sawi.

UN leh international chemical weapons watchdog joint investigation lam chuan Syria sorkarin ṭum thum chlorine gas hmangin helho a bei nia sawi leh, Islamic State (IS) firfiakten an hmelmate beihna atan mustard gas an hmang nia puh chungchang hi an chhui an ni.

Mahse Russia deputy UN ambassador, Vladimir Safronkov chuan resolution chu ṭan lam neia siam nia sawiin, finfiahna rintlak awm lo niin a sawi a, an veto dawn tih a awi.