Congress-ah President Trump-a’n thu a sawi

US President Donald Trump chuan president atana lakluh a nih hnua a ṭum khatna atan Thawhlehni zan khan Congress joint session-ah thu a sawi.

President Trump chuan office a luah kum khat chhunga a hmalak tumna te a sawilang a, healthcare scheme siamṭhat a tum dan te, US ramri thuam ṭhat a tum dan leh, Islamic firfiakte beih let a nih dante a sawilang. Thil ho mai mai ngaihtuah hun a ni tawh lo a, chona hautak tak hmachhawn tur inbuatsaih a ngai a ni, a ti.

Trump chuan American middle class-te chhiah pek ṭhin tihziaawm a tum thu a sawi a, an rama pemluh tumte tana ruahmanna ṭha tak siam a ngaih thu sawiin, Republican leh Democrats member-te an lungrual tlan a ngaih thu a sawi bawk. Mahse ruahmanna a siam tum dan kimchang erawh a la sawilang lo.

Republican kaihhruai Congress chu president hlui, Barack Obama signature healthcare law siam, Obamacare tia sawi chu a aia ṭha leh huam zau zawka siamṭhat a nih theihna turin hnawl ngam turin a ngen.

President Trump-a’n Congress-a a thusawi tlangpuite

- Indona leh buaina an duh lo a, boruak ṭha leh lungrual taka awm an duh thu a sawi.

- US chuan NATO chu a thlawp a, mahse an thawhpui ramte chuan an sum sen tur ang te chu pe ve ngei turin a phut.

- Ram mipuite tan health insurance an duh ang ti tura zalenna pek a duh.

- Damlo leh doctor ten insurance lama sum tam tak an senna ṭhin venna turin dan siamṭhat a duh.

- Dinhmun chhe zawk ṭhalaiten lehkha an zir chhunzawmna tur sum pek an nih theih nana education bill pass a duh.

- US himna turin hmalakna thar siam a ni ang a, US himna tiderthawng theite chu chhuah tir zel an ni ang.

- Immigration policy rintlak leh ṭha zawkin a siamṭhat theih.

- America chuan a khua leh tuite chu a dah hmasa ber tur a ni a, hei hi ram ropui siam leh theihna tur awmchhun a ni.