Israel PM sawisel

Israel Prime Minister Benjamin Netanyahu leh defence official hluite chu, kum 2014-a Gaza War laia Israel inbuatsaih ṭha tawk loah puhin sawisel an ni.

Israel state comptroller-in Thawhlehni-a report a tihchhuahah, PM leh official hluite hi Palestinian firfiak pawl, Hamas-te’n ramri kaltlanga leiverh siam a, Israel an beih ṭhinte lo dang turin a inbuatsaih ṭha tawk lo niin a sawi. Report chuan indo lai hia heng leiverh-te hi Palestinian firfiakte hian Israel sipaite beihna remchangah an hmang a ni, a ti. Mahse Netanyahu chuan security cabinet pawhin leiverh chungchang hi an sawiho niin a sawi thung.

Kum 2014 July thla khan Israel sipaite chuan Gaza Strip-ah Operation Protective Edge an nei a, hei hi Hamas leh Palestinian hel dangten Gaza aṭanga rocket hmanga Israel an beih ṭhin tihtawpna tur te, Israel an beihna hmanrua leh hmunte tihchhiatsakna tura beihpui an thlakna a ni. Beihpui thlak hi inkahhai puan an remtih ve ve hnuah a tawp a ni.

Ni 50 chhung Gaza-a indona thlengah hian Palestinian mi 2,251 vel an thi a, an zingah hian civil mi 1,462 an tel a, mi dang 11,231-in hliam an tuar. Israel sipai 67 leh civil mi paruk a thi bawk a, mi dang eng emaw zatin hliam an tuar a ni.