Russia nena in infiamna hi titawp rawh u : Zelenskyy

Ukraine president Volodymyr Zelenskyy chuan khawthlang ramte chu Russia an infiampuina chu titawp tur leh Russia chungah hrekna lian tham siam turin a ngen. Ukraine ram chu tumah rinchhan loin an la kal zel dawn a, eng ang takin nge an tuar a ngaih dawn tih chu zawhna awmchhun a ni, a ti.

Russia sipaiten Ukraine khawchhak lama Sievierodonetsk leh Lysychansk lak tuma an beih mek kara Russian oil phurhchhuah khapna siam kawngah European Union-te chu an chet muan em avangin Zelenskyy hi tunhnai chhoah khawthlang ramte lakah hian a lungawi lo hle a ni.

Ukraine an run aṭanga thla thumna kal mekah, Russia chuan Kyiv khawpui lak an tumna chu an chawlhsan tawh a, Donbas region-a industrial hmunpuite lak tumin beihpui an thlak leh mek a ni. "Ukraine hi engtik lai pawhin independent state a ni reng dawn a, tumahin an ṭhiat lo ang. Zawhna awmchhun chu kan mite hian zalenna nei turin eng zata tam nge an pek a ngaih dawn tih leh, Russia hian indona awmze nei lo kalpui tur hian engnge hlawkna a neih?," tiin Zelenskyy chuan Ningani zan khan a sawi. "Khawvelin Ukraine-a buaina te hi hmun danga thleng anga ngai pawimawhin, Russia fiam kual vel loin indona tihtawp duh tak tak chu ni se chuan heng buaina te hi tihtawp theih reng a ni," a ti.

Zelenskyy chuan EU ramte'n Russia hrekna siam belh tur chungchanga an inrem thei lo chu sawilsein, an ruahmanna siamte ram ṭhenkhatin an lo dan theih chhan a zawt. EU hian a ṭum rukna atana Russia khuahhirhna siamna tur chungchang an sawiho mek a, heng zingah hian Russia oil phurtu luh khap rawtna pawh a tel. Thutlukna siam tur chuan an pawm tlan vek a ngai a, mahse Hungray chuan he ruahmanna hi a la dodal tlat a ni.

Russia-in eitur indaih lohna a chhawk zawngkhai thei : Putin

Russia-in Ukraine an run avanga khawthlang ramte'n hrekna an siam chu an hlip a nih phawt chuan, khawvelin eitur lama indaih lohna a tawh mek chu nasa takin an chhawk zangkhai thei tih Russia president Vladimir Putin chuan Italy prime minister Mario Draghi nen telephone kaltlanga an inbiak ṭumin a sawi.

"Vladimir Putin chuan khawthlang ramin hrekna an hlip anih chuan Russia sorkar-in eitur indaih lohna tiziaawm turin grain leh fertiliser thawnchhuah a tum a ni," tiin Russia sorkar chuan a sawi a ni.

Putin chuan Ukraine-in an danchah mek, Azov leh Black Sea lawng chawlhna hmuna civil mi la tangkhang mekte tan him dam taka an chhuah theihna tur kawng, humanitarian corridor a hawn tur thu a sawi bawk. Putin chuan global market-a food supply van chhanah Russia an puhna chu thu belhchian dawl lo a ni, a ti.

February 24-a Russia-in a ṭhenawm, Ukraine a run hnuah Russia ram hrekna hrang hrang siam a ni. Heng hrekna leh sipai chetna avang hian Ukraine leh Russia aṭangin fertiliser, wheat leh bungraw dang supply chu a khaihlak phah hle. Ram pahnih aṭang hian khawvela wheat supply zinga 30% chuang thawnchhuah a ni.