Iraq-in Israel nena inkungkaihna nei thi tura hrem theihna dan thar siam

Iraq Parliament chuan Ningani khan Israel mi nen sumdawnna lama thawkdun te bakah, intiamkamna leh inkungkaihna neihpuite hremna dan thar a pawm. He dan bawhchhiate chu thi tur hremna leh, dam chhung tang tura hremnate pek theih an ni ang.

He dan thar­,“Criminalising Normalisation and Establishment of Relations with the Zionist Entity” tih hi seat 329 awmna assembly member zinga 275-te chuan an pawm a ni. Parliament chuan, "Dan siam thar hi mipuite ngaihdan mil taka siam a ni," a ti.

Nikuma Iraq parliamentary election-a seat la hnem ber, Shiite cleric Muqtada al-Sadr-a party chuan dan siam thar chu hlawhtlinna ropui tak nia sawiin, a lawm turin mipuite chu khawlaiah pungkhawm turin an sawm. Central Baghdad-ah mi ṭhahnem tak pungkhawmin Israel dodal zawngin an au rual a ni.

Iraq hian kum 1948-a Israel ram a din hnuah tun thlengin a la pawm ve lo a, he dan pawh hi eng ang chiahin nge kenkawh a nih dawn hriat a la ni lo. Ram pahnihte hian palai thawhdunna engmah an nei lo bawk.