Zelenskyy nena inbiakna nei turin Putin nawr
France leh Germany ram hruaitute chuan Russia president Vladimir Putin chu Ukraine president Zelensyy nena inbiakna mumal tak nei turin an nawr tih German chancellor office chuan a puang.
Emmanuel Macron leh Olaf Scholz-te chuan Putin hi phone kaltlangin minute 80 chhung an bia a ni. Hotu pahnihte hian inkahhai puang tur leh Russia sipaite hnuk kir turin Putin hi an phut tih chancellor office chuan a tarlang bawk.
Russia chuan an ram hruaitu hian Ukraine nena inbiakna neih chhunzawm a inpeih thu a sawi a, mahse president-te pahnih - Putin leh Zelenskyy-te erawh hmaichhanah an inbe dawn em tih a sawi tel lo.
Ukraine President chuan Russia nena inbiak leh hi a thlakhlelh loh thu a sawi tawh a, mahse buaina ti reh tur chuan thil tih ngei ngai anih thu a sawi zui bawk.
February 24-a Russia-in Ukraine a run hnuah, ram pahnih palaite hian ṭum eng emaw zat inbiakna an lo nei tawh a, mahse rah ṭha erawh a la chhuah thei lo a ni.
France leh Germany-te chuan Mariupol-a Azovstal steelwork aṭanga man, Ukraine fighter mi 2,500 te chu chhuahtir turin Putin hi an ngen nghal bawk. Russia hian fighter 900 chuangte chu Russia thuneihna hnuaia awm, Donetsk, Olenivka colony-a tanin siam ṭhatah an sawn thu leh, Donetsk-a Novoazovsk khuaa damdawi-inah hliam na zualte chu an lo dahluh thu a lo sawi tawh.
Ukraine chuan an mi man te hi tang inthleng, prisoner exchange anga an chhuahtir an beisei thu sawi mah se, Russia chuan chhanna an la pe lo thung.
Russia-in Hypersonic Missile kapchhuak
Russia sipaite chuan Ukraine nena an inbeih mek karah, Inrinni liam ta khan Zircon hypersonic cruise missile thar ber chu hlawhtling takin an kapchhuak tih an puang.
Missile hi Barents Sea-ah lawng aṭangin kahchhuah a ni a, km 1,000-a hlaa awm Arctic White Sea-a an target siam chu a kap fuh tih defence ministry chuan a sawi. Ministry chuan ralthuam thar enchhinna kal zelah test hi neih a nih thu a puang zui a ni.
Kum 2020 October thla khan official takin Zicron chu enchhinna neih a lo ni tawh a, president Vladimir Putin chuan thil thleng chhinchhiah tlak tak tiin a sawi hial.
February thla aṭanga Ukraine an run hnuah Russia hian ralthuam changkang zawkte nen beihpui thlak tumin hma an la zel a ni.
March thla khan Russia chuan an inbeih meknaah a vawi khatna atan Kinzhal emaw dagger, hypersonic missile hi a hmang a ni. Putin chuan an ralthuama a ṭha ber zinga mi niin a sawi.